Ringtu Nun - Khawharna

Pathianin duh taka Adama a siam hnu khan a kawppui tur chu a nak ruh hmangin a siam sak a, Adama khawharna leh lunglenna khan Pathian thinlung a khawiha, a anpuiin hmeichhia a siam sak a nih kha. Pathian chuan ama anpui ngeiin mipaah leh hmeichhiaah a siam a, tih a ni. Mihring hi kan inang lo hlawm em em a, khawhar leh lungleng thei tak tam tak kan awm laiin, lunglen khawhar hre map lo tam tak an awm ve tho bawk a.

Kum 2021 bawr vel atang khan Ringtu Nun - Khawharna tih hi ka ngaihtuahnaah a lo lut nasa em em a, hla tlar li lekte ka phuah phah nghe nghe a. Ka ngaihtuahnaa a awm dan hi a fiah loh em avangin ka sawi chhuak thiam lo va, mahni pawhin kan fiah loh hi chu sawi chhuaha fiah mai theih ni hek lo. Ka hrethiama ka sawi fiah thiam lo tite hi chu an hre fiah tak tak lo tlangpui a ni an tia lawm. Mi hriatthiam dan awlsama thu sawi chhuak thiam bik erawh an awm a, tawngkam bungrua an neih that vangte pawh a ni tel awm e.

Ringtute khawharna kan tih lai tak hi han bel chiang deuh ta ila. Pathian thu atang chuan kan thil tih thatte midang hriattir kher hi kan tih tur a ni lo va, a ruka thil tha tihte hi a Pathian thu em em zawk a lo ni a. Kohhran leh Khawtlanga kan rawngbawlnaahte pawh kan tih that lam hi chhuan viau theih ni hek lo, kan tih that tawk loh lam lah a langsar sarah an tang bawk lah tak a, a hrehawm thin a ni. Thil tha kan ti a, mite’n min hriatpui tlat si lo, an hriat loh chu sawi loh min duh khawp lohna leh kan tlin lohna an sawi chamchite hian kan tih thatte hi mahnin kan ngaihtuah chhuak a, kan hah ve zia te, kan chauh ve zia te, heng hrang hrang hi sawi hi a van chakawm thin tak em. Chutianga kan awm lai tak chu khawharthlak hi ka ti tlat zel a ni. 

Lal Isua Kraws-a an khehbeh dawn tum kha ka ngaihtuah let a, lei lam a thlir a, mipui an khat tlat a, khengbet rawh tiin an au a, an phur a, Isua kha an nuizata, an hmusit a, an diriam bawk. Upa J.Vanlalruata (L)-in ‘Lalpa Khawharna Tlang’ a tihte kha a van dik dawn tak. Lal Isua kha khawhar taka a awm ka ring. A hawi anga, an tana thi a ni si a, an hre si lo. An thatna tur a ni tih an hre lo, a tuartu chuan a hre si. Anmahni lam tura lokala kha a khua a va har dawn tak em.

Ringtute hian harsatna leh manganna, sawi chhiatna leh diriamna kan tawk ve fo em, kan Lalpa khan a tuar asin. A thiamthu a sawi thei lo va, a tih that a sawi thei lo. Krismas thupuia kan neih ‘Mahni intidam thei lo’ tih ang chiah khan amah intidam theia kha kha tlangah khan keimahni avangin ‘a intidam thei si lo’ . A chanah hian ka indah chhin a, a hrehawm ngar ngar dawn hi ka ti thin. 

Mihring kan nih chhunga kan tuarna te, kan manganna te hi, heng zawng zawng lo tuar tawh Lal Isua khan min hriatpui a. Kan khawharna pawh hi amah ngei a lo khawhar tawh avangin a hria. Kan mittui tla hi amah ngei pawh thlan thisena far khawpa a lo tuar tawh avangin a hmu a, kan kiangah hian min tahpui turin a awm reng. Engkim titheia bula awm a, kan harsatna min hriatpuia, kan tah nia min tahpui tih hriatna hian min thlamuan mawlh rawh se.