MAHNI THUA INKHUNGHRAN

(Kan chanchin kimchang)

Keimah vanga mi pangate hun hman dan danglam ta chu...

Ka Pi-te in-a chaw eikhawm tur kan ni a, mahse hemi ni tak hian mit hmul pawhsei, rawthniam thiam kan chhungkaw hmelhriat alo kal dawn avangin ka chhungte ho chuan an mit hmul khawih tir an duh avangin chhungkua leh thiantha chaw eikhawm lo ruahman chu thulh a ni a, chu aiah chuan mahniin ka han ei ta zawk a ni. 

Chaw ka eikham chuan thiante nen kan inhmukhawm a, Covid-19 Positive Contact nei ka cousin Aizawla dawr nghak (ka chaw einate) lo haw chu fimkhur thuhlaah Task Force lamte’n an chhungkuaa Home Quarantine an nih thu zan dar 11:00 bawr velah min rawn hrilh ta. Kei lah chu ka thiante panga nen Hmunpui kham hnuaia Sakawrtuichhun mi Lengkir-a tang chhanchhuak turin kan kal ho va, Hmunpui Gate bul atangin chhanchhuaktu Team kal hmasate va pawh tumin kawng chhe mang tara-ah chuan Pick-up leh Sumo-in kan kal a, kawng a chhiat em avang chuan lei si lo van si lovin vawi tam kan sawt phei a, kal luih ngaihna a awm tak loh hnuah kan let leh ta a, chutia kan hel tumna a fuh tak loh avang chuan hun kan khawhral hnem angreng khawp a, kan tel lovin an lo chhanchhuak fel der a, innghahkhawmna hmun RV kan han thlen leh meuh chuan kan awmna lam an rawn pan mek tawh a ni. (A zia tho mai)

Hemi hun hi dar 11:00 bawr niin keipawh chu Task Force-te’n lo chhuak tam lutuk lo la quarantine em chu i ngai lovang min ti zet mahse ka awm a nuam chiah bik lova, ka thiante panga pawh chu tui, kuhva leh meizial inzen tawm vek kan nih miau avangin ka thlen chin chin chu an thlen chin a ni ve tih ka hrechiang nasa mai si a.

Ka hrilh ta hlawm a, eng em a ni lovang ti zet mahse an rilru chuan an chhungte upa tawh tak takte leh natna benvawn neite, an thenawmte naute nei tharte leh an kawmchhak putar an varandah-a rawn thu thinte chu an mitthlaah a lang ve chuaih chuaih tho a nih hmel. 

Chutia kan chhanchhuah tum ber an chhanchhuah takah chuan tawngtainaa tinin kan thian zinga upa ber Tlangval Luck Hruai chhephaka motor bolero Pick-up an tia maw ni chuan kan inkhalh haw ta bauh bauh a; kalkawngah chuan ka inngaihtuah nasa mai a, eng emaw palh ni ta se ka chhungte an upa tawh si a tiin ka chal sam herh pah chuan ka rilru ka kawm thla melh melh a. Rei fe kan tlan hnu chuan kan thianho kawtchhuah Nu Vanrami dawr kan thleng taa, kan Bike theuh lain mahni in lam kan pan ta sang sang a, ka thian pakhat Ruat Kuhva-a chuan mi zui haw a.

Kan in kawt kan thlen chuan engpawh nise inhnuaiah in quarantine phawt mai ang hmiang tiin ka sawm a, ani pawh chuan alo hnial bik lo va an ina haw a hreh ve tho va, a chhan chu a pu a upa ve tawh viau tho a ni.

Chutia thutlukna kan siam chu kan thian dang palite chu phone-in kan be kual a, an chhungte theuh an ngaihtuah ve tho avang chuan kan thuthluk siam chu ti tha min tih hmel hle mai rei pawh rial lovin kan inhnuaia inkhung hrang tur chuan an rawn phei ta sap sap hlawm a, kan mamawh ang angte lamkhawmin kan lut ta rawih a ni.

Tun hma lam han hrut kual leh lawk ila.

Task Force indin tan tirh khan keini ho hi Task Force Committee Member-ah kan tel ve hlawm a, phai atang haw runpui hmasaber leh a dawtah te chuan Sairang nula hmeltha tak tak an rawn haw ve hlawm a, kan Kohhran Hall lamah quarantine an ni a, a vengtu chu keini ho tho hi kan ni. Engtik niah emaw keimahni hi inkhung hran kan ngai ve ang tih reng khang lai khan kan dawn pha reng reng lo. Dinhmun nghet tak hi alo awm theih lo va, tumah hi inbe chhiaa in diriam thei kan nih lohziate, chan that chang leh chan chhiat chang a awm thin tihte hi zirlai pawimawh tak alo ni a, K Hminga’n ‘Tunge inthlei thei’ a tihte kha alo dik hle mai. 

Chutia kan inhnuaia kan inkhung ta chu....;

Tunge eirawng bawl dawn?

Tunge thleng sil dawn?

Heng zawhna pahnih hi pawimawh tak a ni.

Kan thian zinga upa ber bawk hi eirawngbawlin a vei vir nasa hle mai a, chhungkaw nu ber Title pe-in Nu-i tiin kan ko ta a, mahse chutia hmantlak em em chu a ni chiah lo Games buaia buai hi a ni ve bawk a. Tin, kan zinga naupang ber Ruat Kuhva-a hi a ei rei ber ala ni char char a, thleng sil leh sengfel hi chu a hna a ni deuh tawp mai a, awmpuinu tihte pawhin ka ko zeuh zeuh.

Kan zinga a laihawl Justin-a hi tirhkah-ah kan hmang deuh ber a thingpui lum leh tui dahkhah, hmun phiah leh a tul tul thawk deuh bertu a ni. 

Remhre tak mai Scientist tihte pawha an koh thin Mawite-a hi phur thut nei a ni a, a phur thut chuan chhun leh zan emaw a sawi lova thingpui lum leh chaw han chhum maite hi a harsat lutuk lo va, midang tihbuai leh fiam hi a hna pui ber a ni.

Kan zingah Jerinimo-a channel buaipui em em Detective Aw-p-a kan kawl bawk a, kan hna pui ber chu zing thawha chaw ei kham hnuchhui paha mut a ni deuh ber a, chawhma lam kan bawkkhupa, chawhnu lamah kan zangthal leh thin. Ani ho hian kan chhuah hnuah pawh Private Detective hna thawh maite pawh kan zuam ve ta rum rum mai.

Mi hi an fel khawp a. Kan riah zan hnihnaahte phei chuan U Tetei of Dawrveng chuan a birthday cake, pizza leh Silk Cut bawm nga plus papawr kante alo keng a, a khat tawkin min rawn tlawh ve reng bawk a. Anthraxsyakunovbiaktluangavirgopachuaungeimaikhakani-e (Bta) leh Dawng-a of MZP te’n min vil hneh em em a, kan mamawh lamna ber an ni a, an ni hi Task Force-ah an la tel a, thu kal lam leh haw lam pawh kan hriatna hnarte pawh an ni ve a ni. Tin, sawi hmaih hauh loh tur leh sawi loh phal loh Chhungkaw Nu ber chan chang Hruai-a hian tawihte fel em em mai a nei a, Fk-i of Venglai a ni. Ani hian ei in tur min rawn pe reng a, chawhmeh tui tak takte min rawn suah thin a, kei lah hian ka lo fiam sak thin a, kan in sual lo chauh thin. A bak zawng hi chu zawnlai leh zawnglai kan ni deuh fer fur mai, a then hi chu hmu miah lo turte pawh kan awm maithei.

Pathian zarah eng em kan thleng lo turah kan inngai a, eng pawh thleng se kan inpeih thung a ni. Tawngtaina hian thil a tithei a, kan innghahna a ni.

Kan chanchin min rawn zawt thin a, a lawmawm hle mai, min ngaihventu kan la nei tih hriatte hi a nuam ve a, kan fimkhur em avanga inkhung mai kan ni a, midang kai darhtu nih kan hlau tlang a ni. Ngaihtuahawm kan ni lo va, kan ngaihtuahawmna lai ber pawh Kg engzatin nge kan rih belh dawn tih hi a ni mai awm e....!