Sumdawngpa leh Ka Nu Hmangaihna

The Love Story of My Mom

Khaw tin deuh thaw fang kualin khawchhak lama kan unaute an sumdawng thin a, an thiamin kan duh tih pawh kan hriat ngai reng reng loh thlengin tifuh inti takin min lei tir thei zel mai. 

Hralh theihna bik riau hi a mual mual angte hian an nei thin nge ni, chu lai bawr chu an vir hneh bik fo reng a ni. 

In lama ka awm tam loh avang hian kan chhungkaw mamawh leh an thil lakkhawmte/leikhawmte hi ka hriatpui vak lo va, mahse ka room-a hla play-na tur Bluetooth Speaker cute zet te, in urna tur mawi hnai zet mai khawl te tak te ni si te, bike han phuh fainana tha zet tur pipe leh a khawl in zem khat tlat lo awm leh nawlh thinte chuan min ti nui suk thin a,  Khawvela Ka Hmangaiha leh Hmangaihna tluantlinga min Hmangaihtu Ka Nu lo dah a ni tih chu hai rual a ni lo. Ka phur fuh changa inchhung kan hawi kual hian khawchhak lam thilsiam Heater, Bulb, Tui No, Mattress pump puar theih, Torch Light lawmawm tiu teu tak leh thil tangkai tur ni awm tak tak bungbel leh adangte a lo inhung leh hlawl thin a. Tu pa hrilh ngai lovin ka nu leh Sumdawngpa chetvelna a ni tih ka hre thin.

Ka Nu chu bum nuam ti i la chu bumtuah sumdawng ka chhuah dawn si a, thil zawrh nuam tak a ni a ni mahna; sumdawng lokal apiang hian iptepui bannan tak an rawn hmang a. Hripui len hmate kha chuan kan chawei dawhkana Sumdawngpa chaw tui tih hmel taka lo kil chaw thial pawng talh talh hmuh zeuh zeuhte kha thil mak a ni tlat lo. Bat lah hi an han phal khawp a, " ₹8000 man a nia ba tawp rawh, lokal leh hunah pe mai dawn lawm" han tih maite hi an harsat lo. An hriat ngai reng reng loh, an chhungkaw eizawnna bulfuk pawh an hriat lohte hi ring ngam takin an bat tir thei tlat. An taima em em a, an hralh hma chu an inpu kual ngat ngat zel. An thil tihah an chiang em em a, a tawp thlen rak chu a tum a nih mai piah lamah an tih ngei ngei tur a ni tawp. In ah haw leh hi an thil tum loh nghet bura an neih ve chu a ni bawk. Taimakna leh tumruhna, thil tiha chianna leh tuina, a tawp thlen tumna leh tei rei peihna, chhelna leh huaisenna, rinawmna leh midang rinngamna, hengte hi an ngai pawimawh tih hriat takin a takin an lantir thin. Kan tih ve theih reng taima taka an tih avanga an hlawhtlin chhoh mekna chuan Mizoram chhungah ngei pawh entawntu a pun tulh tulh a, taima tak leh rim tak bei hram hram an pun phah a, hma min sawn tir a ni. Thenkhat ve thung erawh dik lohna leh rinawm lohnain an khat a. Thil tha lo leh dan pela chet ching an awm leh zeuh thin hian an hming a tichhe ve fo.

Tumkhat chu ka school bang hi kan Gate bulah hian sumdawng pakhat hi a lo ding ran mai a, kan step lam ka han hawi thlak chuan ka pi nau hian zai-zira sumdawngpa chu "Kal rawh, kal liam rawh" ti niawm taka a kut a lo vai lauh lauh ka zuk hmu a, sumdawng pa lo luh a hlau tih chu hrilh nawn ngai reng reng lovin ka hre sa nghal a ni. Lut se zawng Table Fan thar kan nei ngei ang.

Tumkhat chu, ka bang ka haw chu ka nu hian tifuh inti zetin, "Bawiha, chhuar kha han enteh, plate set thar ka lo lei a, ₹2500 chiah ka pe rih a, 3000 min bat tir a" a lo ti a. Keipawh chuan, mamawh tak i lei a a lawmawm hle a nih chu ka ti sam et a. Thla a vei a, kum a vei leh a, vawiin thlengin ba a rawn khawn ta reng reng lo chu a nia. (₹2500 khan a ti fuh tawk a ni maithei a ni.)

Ka Nu chuan ka hahdamna turin Mattress pump puar theihte min lei sak thin a, rei mu lo mah ila, hmangaih taka min leisak a nih miau avangin ka mut chhunah kha chuan mutui tak ka ni. Ka lunglen hlauin Bluetooth Speaker cute zet min lei sak a, khawhar min hnem a hnekin a tizualtu atan a lo tha hlei hlei a, insuk pahte leh chhuat nawh pahtein ka naute ho in an hmang tangkai em em bawk. Zana lehkhabu ka chhiar theihnan eng tha tak min chhit sak a, ka ha a var theihnan Toothbrush kum khat daih zan tur min chhawp sak thin a, ka mamawh ka hriat aiin min hriatsak a tam zawk mah awm e.

Nu-te hi an lo hluin, engkim an lo ni a. Hmangaihna an lantir dan chu a in ang lo fur ang, hetia ka sawi avang hian talhfiak dawng ngai lo ka ni hauh lo va, ka naupan lai zawnga ka mawmg vual tet tutte leh chhuat laia thlem hleihtheih hauh lova ka inleng nasat em em na chhan chu phelsep thiltihtheihna ka dawn nasat vang a ni. Mahse, chu zawng zawng pawh chu hmangaihna a ni.

Tumkhat chu mi pawi ka khawih palh hlauh mai a, ka mangang em em mai a. Ka hlau leh thlabar lutuk chuan ka nun a tichau a, zan pawh ka mu thei lo thin. Chaw ei lah chu a tui lo em em a. Chutia mangang taka ka awm laia min hnemtu leh ka tihsual chu ti nawn leh tawh lo tura min fuih a, thil kal tawh avanga indem reng lova intiharh thar tura min nawr kaltu chu ka nu a ni. 

Ka tan chuan ka engkim a ni a, Pathianin a hring a hrana ka tana awm tura a Vantirhkoh rawn dah ang maiin min veng tlat a, kei aia awmnem zawk ni mahse ka hmaa din tlat la chuh vut vut thin Nu Huaisen a ni. 

Tlangval pahnih zui ruiin ka nu zan mutui lai chu an au tuarh tuarh mai a, chutih hunlai chuan kum 6 vel mi ka ni ang. An au dan pawh chu a mawi lo em em a. Ka nu chuan a tuar ta tlat lo, khum atangin a inbin tho nalh mai a, kawngka hawn leh vawkchaw chawhna thing chu lak a ruala. A in sawh chho ngheng ngheng mai a, tlangval pahnih chu ko dingin a chhoh en ha mai a. Sawi tur tul leh pawimawh a sawi zawh chuan ka hlap pawp mai tur che nia an ti zeuh pek a. Tlangval tlawm la lutuk chuan, "Ka pi, min han hlap ta che" a ti fel zo chiah a, a thal nghal zar mai asin le.

Pasal fanaute uap lum hneh nu dangdai-i chu a huaisen zek a, a kum a tam tial tial a, a tha thum ta deuh deuhva, fa pali leh a pasal a sun tawh a, amah pawh tunhma a pha tawh lo a ni. Pawn chhuah hi khawvela a thil peih loh ber a ni a, chhiat that nikhuaa kal te, Krismas ruai theh te, inkhawm leh pawn chhuah ngai chi hrim hrim hi a duh lo va, pawnchhuahphobia a nei a ni. Vawi tam kar thin mah ila, a luhlulna lam taka chuan Nu tihmawh tak zawng a la ni tluanchhuak parh. In lama a awm tam avang chuan min uap lum hneh em em a, zingkar atangin a duh duh a sawi a, a ngaithla peih peih leh a dawngsawng thiam thiam mi vannei kan ni mai. 

Ka Nu hlimna chu a tute-ah a ni a, sa tlang khat chauh awm se a ei dawn lo tih chu kan hre sa vek a, a pek pek khan lawm taka ei hmak a ni mai. A ngai lo ti eng ang mah ila, Ka Nu chuan a ei dawn lo reng reng. Kan hmangaih let thiam ve em tih chu amah hian a hria ang a, keini tehna atang chuan a hmangaihna a nasat em avangin 'Ka ngaina che tih i hria e' tih ang bawr vel kha mark kan inpek dan a ni.

Ka Nu hlimna dang leh chu Sumdawngpa thil zawrhah hian a ni leh tlat. A thil bat leh lei reng reng hi tha a ti em em a, mawi a ti a, tifuh a inti thin hle a ni. Thei i la, nitin a leina tur pe thei i la ka inti rum rum thin. Rethei taka seilianin rethei bawka hringnun hman liam tir chu ka phal hlawl lo a ni. 

Ka Nu chuan ka zirna in min hmuhpui ngai lo va, pawn lama ka nunchang min hmuhpui ngai lo va, ka inkhawmnaah min hmu ngai hek lo va, ka thusawi pawh a ngaithla ve ngai hauh lo. Mahse, chung ka thil tih zawng zawng hmu thintute ai chuan ka nu chuan min hmu fiah fai zawk teh tlat a, chumi chu chuti zawk chuan, khami kha khati zawk tur kha, a ti thei tlat zel. 

Lalpa malsawmna ka dawn Ka Nu hi ka hmangaih let ve em em a, a hmangaihna ka dawn chu pha lo mah ila, khawvela ka pek theih sang ber ka nunna hial pawh hlan ngai se Ka Nu tan chuan ka phal reng. 

Nitin a duhzawng a lei theihna tur sum nei lo mah i la, a nun tihlimtu ka ni ve hrim hrim hi ka lawm a ni. 

A birthday kan hriat loh, a pian kum, ni leh thla hre lotu Ka Nu ngei mai chu keizawng ka ngaina ber.